بسم اللہ شریف کی معکوس کتابت کا شرعی حکم

مفتی منیب الرحمٰن

تفہیم المسائل

سوال: ایک مقامی ہسپتال کی عمارت پرائیویٹ ڈاکٹرز کے دفاتر پر مشتمل ہے ، اس عمارت کے ہال کی دیواروں پر سو سے زائد مرتبہ ’’بِسْمِ اللہِ الرَّحمٰنِ الرَّحِیْم ‘‘لکھی ہوئی ہے ، واضح نظر آتا ہے کہ دائیں طرف سے بالکل صحیح لکھی ہے جبکہ بائیں طرف سے اسے اُلٹے رسم الخط میں لکھا گیا ہے(تصویر منسلک ہے) ، میری ناقص معلومات کے مطابق یہ آیتِ قرآنیہ کی توہین ہے اور اس کی اصلاح کی جانی چاہیے ، انتظامیہ کا کہنا بھی یہی ہے کہ آپ ہمیں فتویٰ لادیں تو ہم اسے درست کردیں گے ، شرعی رہنمائی فرمائیں۔(محمد اطہر قریشی ، کراچی)

جواب: تسمیہ (یعنی بسم اللہ ) کی کتابت صاف اور عمدہ خط میں کرنا رحمت اور بخشش کا سبب ہے ،حدیثِ پاک میں ہے: ترجمہ:’’ حضرت انس بن مالک بیان کرتے ہیں: رسول اللہ ﷺ نے فرمایا: جس نے اللہ تعالیٰ کی تعظیم کے لیے عمدہ شکل میں ’’بِسْمِ اللہِ الرَّحْمَنِ الرَّحِیمِ‘‘تحریر کیا ، اللہ تعالیٰ اُسے بخش دے گا ،(تاریخ اصبھان : 1746)‘‘۔قرآن کریم کی معروف کتابت ’’رسمِ عثمانی‘‘ کہلاتی ہے، رسم عثمانی پر صحابہ و تابعین کا اجماع ہوا ہے اور آج تک پوری امت مسلمہ کاا س پر اتفاق قائم ہے۔

علامہ جلال الدین سیوطی رحمہ اللہ تعالیٰ لکھتے ہیں: ترجمہ:’’امام بیہقی ’’شُعَبُ الایمان ‘‘ میں لکھتے ہیں: ’’جو شخص مصحف شریف لکھنا چاہتا ہے تو چاہیے کہ اس رسم الخط کی پابندی کرے ،جس سے صحابہ ٔ کرامؓ نے مَصاحفِ (عثمانیہ) لکھے ہیں، ان کی مخالفت نہ کرے اور نہ ان کی لکھی ہوئی کسی چیز میں کوئی ادنیٰ تغیر کرے، اس لیے کہ وہ حضرات پوری امت میں سب سے زیادہ علم والے اور قلب وزبان کے اعتبار سے سب سے زیادہ سچے اور سب سے زیادہ امانت دار تھے، پس خوش فہمی میں مبتلا ہوکر ان پر استدراک کرنا ہمارے لیے جائز نہیں ہے، (الاتقان فی علوم القرآن ، جلد4،ص:169)‘‘۔

قرآن کریم کو معکوس اور اُلٹا پڑھنا خارج صلوٰۃ میں بھی مکروہ تحریمی ہے، چاہے سورت کے اعتبار سے ہو یا آیت کے اعتبار سے ہو۔ اسی طرح اُلٹا لکھنے کی بھی ممانعت ہے۔ نیز ہمارے فقہائے کرام اس درجہ احتیاط کے قائل رہے ہیں کہ مسجد کی دیواروں اور محراب میں بھی قرآن لکھنے سے منع فرمایا۔

علامہ نظام الدین ؒ لکھتے ہیں: ترجمہ:’’ اوراگر قرآن کریم (کا کوئی حصہ) دیواروں اور چار دیواری پر لکھاجائے تو بعض فقہائے کرام نے کہا: جواز کی امید کی جاسکتی ہے اور بعض نے اسے مکروہ کہا ہے کہ مبادا (اُن کی کھرچن) زمین پر گرے اور لوگوں کے قدموں تلے آئے ،جیسا کہ ’’فتاویٰ قاضی خان ‘‘ میں ہے ، (فتاویٰ عالمگیری ، جلد5، ص:323)‘‘۔ صدرالشریعہ علامہ امجد علی اعظمیؒ لکھتے ہیں : ’’مسجد کی دیواروں اور محرابوں میں قرآن لکھنا اچھا نہیں ہے ، اندیشہ ہے ،وہاں سے گرے اور پاؤں کے نیچے پڑے ،اِسی طرح مکان کی دیواروں پر کہ عِلّت مشترک ہے ،(بہارِ شریعت ، جلد سوم،ص:646)‘‘۔

بہتر یہ ہے کہ حصولِ برکت کے لیے صرف درمیان میں بسم اللہ شریف کندہ ہوئی ایک تختی نصب کردیں جو بلندی پر ہو اور ٹوٹ کر یا جھڑ کر گرنے کا احتمال بھی نہ رہے ، جس طرح قرآن کریم کو الٹا پڑھنا ، خواہ سورتوں کی ترتیب کے خلاف یا آیات کی ترتیب کے خلاف ہو، درست نہیں ہے ، اسی طرح اُلٹا لکھنا بھی درست نہیں ہے، الٹا لکھنے سے مراد ہے : بائیں جانب سے دائیں جانب کی طرف ، یہ سنتِ مُتوارثہ اور از سلف تا خَلف پوری اُمت کے تعامل کے خلاف ہے اور اس میں کوئی ظاہر ومستور حکمت بھی نہیں ہے، سوائے اس کے کہ اسے ایک آرٹ بنانا مقصود ہو اور کتابتِ قرآن کو آرٹ بنانا حکمتِ دین کے منافی اور خلافِ ادب ہے مزید یہ کہ پڑھنے والوں کو دشواری ہوتی ہے ،کیونکہ اگر پڑھنا مقصود نہیں ہے ،تو یہ پینٹنگ کی قسم سے بن کر رہ جائے گا، اس لیے یہ شعار درست نہیں ہے۔