اجارے پر اجارہ

مفتی منیب الرحمٰن

تفہیم المسائل

سوال: اسکول مالکان نے احمد کو کینٹین ماہانہ دس ہزار روپے کرائے پر دی، ایڈوانس پچاس ہزار روپے لیے۔ احمد نے اسکول انتظامیہ کے علم میں لاکر کینٹین اظہر کو پچاس ہزار روپے ایڈوانس اور ماہانہ دس ہزار روپے کرائے پر دے دی، لیکن ساتھ ہی دو لاکھ دس ہزار روپے اظہر سے Goodwill کے نام پر لیے اور یہ رقم احمد نے خود رکھ لی ، اسکول مالکان کو اس سے لاعلم رکھا، اس کا شرعی حکم کیا ہے ؟ (شیخ عبدالرحمٰن ، کراچی)

جواب: اسکول مالکان اور احمد کے درمیان ہونے والا عقد ’’اجارہ ‘‘ ہے ،اجارہ کی شرائط میں سے ایک شرط یہ ہے کہ اجارہ کرنے والا مالک ہو یا مالک کی طرف سے اُسے اجارہ کرنے کا اختیار حاصل ہو ،فضولی (یعنی بلااجازت تصرُّف کرنے والے) نے جو اجارہ کیا ،وہ مالک یا ولی کی اجازت پر موقوف ہوگا ،علامہ نظام الدین ؒ لکھتے ہیں: ترجمہ:’’ اجارہ کی شرائط میں سے ایک شرط مِلک وولایت ہونا ہے ، پس مِلک اور ولایت نہ ہونے کے سبب فضولی کا کیا ہوا اجارہ منعقد نہیں ہوگا، لیکن ہمارے نزدیک فضولی کا کیا ہوا اجارہ مالک کی اجازت پر موقوف ہے(اگر مالک نے اجازت دے دی تو جائز ہوگا)‘‘۔(فتاویٰ عالمگیری ، جلد4،ص:411)مزید لکھتے ہیں ’’ اگر کسی شخص نے کوئی مکان یا دکان کرائے پر لی ،جس مقصد کے لیے کرائے پر لی ، وہ بیان نہیں کیا ،استحساناً اجارہ جائز قرار دیاجائے گا اور مستاجر کو اختیار ہے کہ اس میں خود رہے یا دوسرے کو رکھے‘‘۔(فتاویٰ عالمگیری ، جلد4،ص:470)

جب اسکول انتظامیہ کے علم میں لاکر احمد نے کینٹین اظہر کو دی اور ایڈوانس اور کرائے کی رقم اسکول مالکان کو دے دی گئی اور انہوں نے قبول کرلی، تو یہ اجارہ اسکول مالکان اور اظہر کے درمیان درست طور پر نافذ ہوگیا۔ اگر احمد نے کینٹین میں فرنیچر یا کوئی سامان لگایا اور اس بنیاد پر اس نے اظہر سے اضافی رقم لی تو یہ اُس کے لیے جائز ہے ،اس رقم کے لینے کا استحقاق اسکول انتظامیہ کو حاصل نہیں ہے ، البتہ اسکول انتظامیہ ایڈوانس پچاس ہزار روپے سے بڑھا کر لے ،تو اس کا اُسے حق حاصل ہے ۔